Naskah Teater Bahasa Banjar: Kuyang di Kampung Tugul (part. 2)

 (Lalu keluarlah pak RT dan istrinya Mariyam dari rumah, didepan pintu mereka berbincang, sebab suaminya mau pergi ke kota untuk membeli sesuatu)

Siti : nah nah tu urangnya jangan tapi nyaring, (mereka menguping)

Pak RT : Ulun tulak dulu yank lah, stumat aja ke Kota batutukar yang Pian pesani tadi

Mariam : geh abahnya lah, jangan kada ingat N-max kaluaran terbaru sebuah, lawan jua sepeda listrik sebuah

Pak RT : sepeda listrik gasan apa ? Ada ja N-Max kena nukar

Mariam : Uma ai Pian nih, kada mau kah, sepeda listrik Ulun handak banar, sekira kita hemat jua, Mun bajalan jauh Hanyar pakai N-Max, Mun Parak Parak ja pakai sepeda listik ja, jadi kada haran bensin

Pak RT : aja sayangku ai, Ulun tukarkan Pian sepeda listrik jua

Mariam : Tilam jua lah, kulkas jua, lawan jua kompor gas Nang hanyar gasan bamasak

Pak RT : inggih aja Ulun tukarkan, Nang didapur tu sudah rusakan jua dah

Mariam : sabuting lagi, baju lah jua Nang hanyar, Mun ada duitnya masih tukarkan Galang Amas manambahi nang ada ni

Pak RT : inggih, kena Ulun tukarkan, aja Ulun berangkat dulu lah, Pian kada usah bemasak kena Ulun tukarkan ja ayam KCF kesukaan Pian

Mariam : heh hadang, Ulun umpat ja gen, selajur ke KCF lo pian

Pak RT : maka Pian handak batatapas

Mariam : anu kena gen Ulun upahakan ja lawan Acil Mala batatapas, diupahi 100 ribu hakun ai kayaknya Acil Mala

Pak RT : ayo ai dah kita Tulakan

( Pak RT pun pergi bersama Mariam )

Siti : apa jarku, lakinya tu inggih inggih haja lawan si Mariam tu

Aluh : banyak baduit ha pulang, Mangaji sugih

Siti : ya kuyang tu Mangaji sugih dan mengaji bungas hasil sugih dan bungas

Miyah : cucuk ai, liput banar bakarudung, padahal di muka rumah haja

Siti: ya sekira garis di gulu nya tu kada kelihatan

Siti : Ikam Mun dimuka rumah ja bekarudung lah ?

Miyah : kada pang, Mun jauh Hanyar bakarudung

Siti: nah Mariam tu, dimuka rumah ja bakarudung inya, Nang lebar ha pulang kerudung nya

Aluh : sah dah ku yakin banar inya kuyang, Mun dibiarkan ja bisa makan korban

Miyah : maka ujar urang, Mun inya kalaparan banar kada dapat Ari Ari bayi inya bisa memakan ke jantung sapi atau kambing

Aluh : Mun sapi atau kambing kadada ?

Miyah : yaa meisapi darah manusia haratan guring, Mun keasikan guring ya jantung dimakannya haratan guring

Aluh : ih seram nya

Siti : kada Kawa dilihatakan Nang kaini ni, sebelum memakan korban, baik kita usir aja Mariam tu

Aluh : tapi lakinya RT

Siti: kada tahu RT atau apa kah, Mun sudah kaini nyawa taruhannya sebelum memakan korban, baik kita usir bedahulu dari kampung 

Miyah : iih, aku takutan jua, ni aku batinan stumat lagi menujuh bulan, kalo Pina apa apa lawan anakku kayapa

Siti : berarti kita kumpulkan ja warga, mendemo ke rumah pak RT, suruh inya bejauh dari kampung ni

Miyah : buktinya kayapa ? Ada kah buktinya ?

Siti : aku lawan lakiku saksinya, malihat Sorang kuyangnya mirip lawan Mariam

Aluh : ayu jaa kena ku bawai buhan sana mendemo jua

(Siti dan miyah keluar set panggung dan Siti menuju rumahnya, di samping rumah pak RT)

Siti : .. bah . Uy bah, bukai ( Siti mengetuk pintu rumahnya)

Dimas : uh umanya kah ,, ( Dimas keluar rumah dan Dimas tengah tengok kanan kiri melihat ada orang atau tidak)

Dimas : kayapa Uma nya .. sudah kah di gawi ?

Siti : tanang abahnya ai, urang urang percaya kalo si Mariyam kuyang

Dimas : nah sip banar dah tuu, pacangan di usir warga kena

Siti : iih Muar banar Ulun jua lawan dua laki bini tuh, wahini Pina mengoyoi kita banar, nukar ini itu batampai lawan kita, kisah apa kah, handak batampai banar

Dimas : kena Mun buhannya tu di usir otomatis kada lagi inya jadi RT disini, nah aku ai kena mencalonkan diri sebagai RT sorangan. Soalnya Minggu kena pemilihan RT Lo, yang mecalon Ulun lawan inya, Amun kada dikaini kan pacang tapilih pulang inya jadi RT. Amun inya di usir di kampung ni otomatis menang aklamasi Ulun di pemilihan RT.

Siti : banyak lah duit nya jadi RT tu abahnya ?

Dimas : banyak !, saban bulan dapat gaji, Mun ada baurusan ini itu warga ma amploki, tanda tangan dapat duit, kena rapat rapat dapat duit, Balum lagi pambagian sembako sembako RT pasti dapat badahulu.

Siti : ni pang kaya kita membuktikan kalo si Mariyam ni kuyang, kita kadada buktinya jua Lo

Dimas : bubuhan warga sudah terlanjur percaya jua dah, tinggal di kompori, propokatori kada Kawa bepender lagi am inya, lawan jua inya gen kada Kawa membuktikan jua kalo inya lain kuyang. Soalnya tuduhan tuduhan ciri ciri kuyang pas banar ke Mariyam dah

Siti : tapi kada nyaman Ulun kalo Pina ketahuan kita memfitnah

Dimas : eh, Pian handak nukar N-Max Hanyar kada ?.

Siti : inggih handak banar, lawan sepeda listrik lah

Dimas : gasan apa ?

Siti : di kampung kita ni Balum ada lagi Nang beisi sepeda listrik

Dimas : oke umanya ai gampang haja masalah itu, Nang penting isuk kita pastikan bahwa pak RT lawan bininya ta usir dari kampung ini

Siti : inggih 

( Dimas dan Siti masuk dalam rumah)

(Lampu meredup dan gelap)

Episode malam terakhir

(Lampu perlahan menyala, Susana malam)

Salim : lah manaan urangnya nih, Pina sunyi banar selawas ada kuyang ini, yang takana giliran jaga gen kada turun saking takutannya (duduk di pos)

Salim : kampung kah kuburan kah ini, kadada buriniknya lalu, ni tukang cofe jua kadada buka lagi imbah ditamui kuyang, garing jer kapidaraan. Ah lemah lalu, kaitu ja takutan

Salim : Jenifer ... Uy Ding Jenifer (mengarah ke rumah Jenifer)

Salim : amun Pian Pina takutan sorangan Ding ai, kiau haja Kaka, Kaka Salim siap haja mengawani Pian 24 jam

Salim : apa lagi kalo Pina ada kuyang, kalu Pina dikucup kuyang Ding ai, babiru babiru awak Pian, lebih baik di kucup Kaka Salim, muachhhh ( centil)

Salim: guring saku ading Jenifer ni, jadi kadada menyahut

Salim : aja Ding ai, sampai ketemu di alam mimpi haja lawan Kaka lah, i miss you

( Kembali duduk di pos ronda, agak gelisah karena sendirian dan kedinginan)

( Dimas dan Siti keluar rumah membawa kuyang (boneka kuyang) yang di gantungkan dengan kayu dan tali seolah olah kuyang sedang melayang. Digelap remang remang Dimas dan Siti tidak terlihat, hanya kuyang yang seakan melayang)

Siti : hihihi (menakuti dengan suara kuyang)

Salim : ..... ( Terkejut, gemetar dan lari)

Salim : kuyang.... Kuyang... Kuyang ( sambil lari )

Dimas : hahahaahhaha

Siti : hahahaha tumbur pulang to isuk rami urang bakisahan kuyang

Dimas : ayo dah masuk, kalo pina ada nang malihat kita

(Siti dan Dimas masuk rumah)

(Lampu meredup dan gelap)

Episode Penutup

(Suasana pagi hari, warga sudah ramai berkumpul didepan pos ronda, berkumpul ingin menuju rumah pak RT, ditambah dengan beberapa piguran menjadi warga )

Miyah : ku dengar dangar malam tadi si Salim disasahi kuyang 

Aluh : iih ada ai aku mendangar

Cafe : kada aman lagi sudah kampung kita ni

Siti : tahu haja Lo dah siapa kuyang di kampung kita ni

Dimas : ini haja nahh, kita barataan takumpulan, si Mariam lawan lakinya kadada, cuek banar lawan masalah kuyang kampung kita, padahal ketua RT

Siti : kita usir ja dari kampung ni

Semua : bujur ! Usir !

Aluh : meresahkan banar sudah, sebelum ada korban jiwa, kita usir haja

Cafe : tapi Mun di usir, siapa Nang jadi RT meurusi wadah kita ni

Dimas : Mun masalah RT gampang haja, kena aku siap menjadi RT nya, lawan jua pemilihan RT setumat lagi jua. Amun darurat kita majukan aja pemilihan RT. Aku siap haja menggantikannya

Cafe : ayoo ai.. aku setuju haja, iih kita pecat sekalian RT Nang ada ni selajur kita ganti lawan Dimas, setuju !?

Semua : setuju !!!

(Semua bergerak ke rumah pak RT )

Siti : uy kuyang kaluar Ikam, kami sudah tahu dah seberataan kada Kawa mengelak lagi Ikam, kadada alasan lagi

Semua : ( gemuruh meminta keluar)

( Pak RT dan Mariam pun keluar)

Pak RT : eh kenapa ini ada apa ? ( terkejut banyak warga )

Dimas : jangan pura pura kada tahu pak RT ai

Siti : iih jangan pura pura kada tahu

Aluh : Pian tu bakajian sugih dan bini Pian bakajian bungas Lo, jadi kuyang 

Semua : ( gemuruh mengusir, mencaci maki)

Cofe : gara gara ulah bini Pian warung cofe Ulun sunyi wahini, ah dasar kuyang

Pak RT : hadang dulu maksudnya ni aku kada tahu (langsung disela)

Siti : kada usah banyak alasan bejauh haja dari kampung ini

Semua : ( gemuruh mengusir)

Pak RT : apa buktinya kami bakajian sugih wan bakajian bungas

Dimas : itu buktinya Pian banyak batutukar barang, si Mariam jua Banyan baisian Amas, bagawi bahuma haja, mana Kawa nukar nang kakaitu tu .. Mun kada jadi kuyang ma apa lagi, babi ngepet kah ?

Semua : ( gemuruh mencari dan mengusir, dan melemparkan benda benda ke arah pak RT dan Mariyam ( bola kertas dll benda tidak berbahaya)

Pak RT : aku banyak duit, karena tanah warisan kuitanku di kampung laku di beli pemerintah untuk dijadikan bandara, tanahnya di beli 4 kali lipat oleh pemerintah

Dimas : ah kada masuk akal badusta haja 

Semua : usir usir usir .. ( marah, mencaci )

Dimas : keluar kalian dari kampung ini ( menarik narik baju pak RT)

( Ketika pak RT dan Mariyam di seret seret datang lah, Ani anaknya Dimas pulang dari kuliah membawa boneka kuyang, semua terdiam melihat Boneak kuyang yang di bawa Ani. Dimas dan Siti tampak gugup dan takut, aksi kebohongan akan terbongkar)

Aluh : eh Ani, ini boneka apa ?

Ani : boneka kuyang , kenapa cil ?

( Semua terheran dan tercengang)

Aluh : gasan apa Ikam Boneka ini ?

Ani : gasan Ulun main teater di kampus, Ulun kebetulan umpat sanggar di kampus, jadi tadi Ulun bawa gasan main teater kisah kuyang kuyang kaitu nah

Aluh : uuuhhhh kaitu (melirik ke Dimas dan Siti )

Pak RT : siapa yang meulahakan kuyang ni ?

Ani : Abah Ulun, mun malam pas banar kaya kuyang bujuran, ada beberapa kali di Tes abah mama ulun, malam malam

Cofe : nahhh.. Ikam ketahuan sudah lahhh.. ( menarik baju Dimas)

Pak RT : oh Ikam jangan kaitu lah, mentang mentang handak pemilihan RT, Ikam black campain namanya nih.. memfitnah lawan politik

Semua : uuhhhhhhhhh.. ( gemuruh mencaci dimas dan siti )

Pak RT : nah ketahuan kalo dah siapa yang jadi kuyang selama ini

Aluh : ayo dah kita bawa ke balai desa ja kita sidang lawan kepala desa

Semua : ayooo ayoo bawa, meresahkan haja, maulah Tumbur kampung haja

Pak RT : ya bawa bawa wadah pembakalan, kena aku susul kesana

( Dimas dan Siti pun di bawa ke balai desa, keluar set panggung)

Ani : eh, eh, kena Abah mama Ulun d bawa ke balai desa, salah apa, masa baulah Boneka kuyang aja di bawa ke kantor desa, salah kah ?

Aluh : aja umpat gen Pian jua ke balai desa, sekira tahu apa Nang Abah mama Pian ulah di kampung ni

(Mereka keluar set panggung)

Pak RT : kasian Dimas wan bininya lah, gara gara handak jadi RT ja segitunya baulah fitnahan lawan kita

Pak RT : aku gen sabujurnya kada handak jadi RT ni, lapah maurusinya, bujur haja pang sabulan dapat gaji, tapi Mun apa apa Taka Sorang, lampu jalan mati Sorang Nang manukar, apa apa Nang rusak di kampung ini Sorang dulu manalangi, iih Mun ada dana kas, Mun kadada berelaan ai

Mariam : ya jakanya basaing haja bujur bujur, kampanye Nang sehat, jujur. Mun bagus, dinilai pantas jadi RT, pasti ai di pilih warga. Kaya Pian kakanda ai pantas jadi RT makanya di pilih warga

Pak RT : Amun Ulun kada jadi RT lagi masih sayang lah Pian lawan Ulun

Mariam : Amun itu jangan ditakuni lagi dah kakanda ai, Pian nomor 1 dihati Ulun, jadi RT atau kada kah

Pak RT : uh ai bisa banar adinda Ulun ni heh

(Tiba tiba datang Salim, membawa wancuh kayu, berlari ke arah rumah pak RT )

Salim : hey kuyang bajuah ikam dari kampung ini ( sambil mengawai kan wancuh ke arah Mariam)

Pak RT : eh eh apa ini, hanyar guring kah Ikam Lim ? Makanya jangan melandau guring Lim ai. Itu kuyangnya sudah tangkap

Salim : hah ? Maka bini Pian kuyangnya

Pak RT : ujar siapa ?

Salim : ujar Dimas pang, kuyangnya mirip lawan bini Pian jer

Pak RT : nah salah alamat am ikam Lim ai, ketinggalan berita akibat guring malaudau, datangi sama ke balai desa, kuyangnya ada disana, tatangkap dah

Salim : oh iya kah, aja Ulun kena ke sana, siapa kuyangnya pak RT ?

Pak RT : Jenifer !

Salim : hah Jenifer kah ? Bujuran ?

Pak RT : iih bujuran coba datangi ke balai desa, warga kesaan takumpulan, aku kena handak ke sana jua

Salim : ah, Mun Jenifer kuyang nya berarti harus Ulun selamatkan ( Salim berbalik arah dan menuju balai desa keluar set panggung)

Salim : Jenifer sayang, kakanda akan menyelamatkanmu, handak Pian jadi kuyang kah, kuntilanak kah apa kah, mak lampir kah, kakanda tetap cinta dan sayang lawan Pian (sambil berjalan kearah luar panggung)

( Pak RT dan Mariam tertawa hahahahaha, arah ke balai desa keluar panggung)

Lampu redup

Tepuk tangan 

Selesai

Para Pemain :

Dimas

Salah satu calon ketua RT di pemilihan RT yang akan datang

Siti

Istrinya Dimas

Aluh 

Warga kampung, ibu ibu

Miyah

Warga kampung, ibu ibu

Cofe

Penjual cofe di samping pos ronda

Salim

Pemuda kampung, nyentrik, suka dengan Jenifer 

Jenifer

Tidak terlihat, seorang janda yang baru melahirkan, suaminya meninggal sebelum melahirkan

Pak RT

Ketua RT 6, berbaju batik dan / berbaju sapari

Mariam

Istri ketua RT, banyak pakai emas, dan pakai jilbab lebar

Ani

Mahasiswi, Anaknya Dimas dan Siti, pakaian kuliah / almamater

Pedagang Sayur

Pedagang sayur, membawa dagangan tanpa bicara

Piguran

Laki laki dan perempuan 3-5 orang di panggung pas demo

Biodata Singkat penulis

Arif Riduan, S.Sos.I, aktif berkesenian di Sanggar Tasmaq Annida sejak masuk kuliah tahun 2010. Pernah berkuliah di jurusan Bimbingan Penyuluhan Islam, IAIN Antasari Banjarmasin tahun 2010-2014. Pernah menerbitkan beberapa buku kumpulan cerpen dan kumpulan puisi. Pada masanya juga sering menjadi aktor pada pementasan yang diadakan oleh Sanggar Tasmaq Annida dan panggung seni lainnya. Penulis dapat bertegur sapa di Instagram @areef.ole 

Pernyataan Penulis

Salam seni, saya adalah sebenar-benarnya penulis naskah ini dengan murni imaginasi pikiran saya yang saya selesaikan pada tanggal 9 Februari 2024. Naskah fiksi ini dibuat semata mata sebagai naskah hiburan pertunjukan, baik untuk latihan atau penampilan dan tentu tidak bermaksud untuk menyinggung atau merendahkan seseorang atau kelompok/instansi tertentu, hanya hiburan semata.

Naskah ini saya izinkan untuk dipakai secara gratis, namun saya mewajibkan kepada siapapun yang memakai naskah ini untuk meminta izin / menginformasikan/ mengabarkan kepada saya sebagai penulis, baik secara surat formal atau chat bia

sa di email arif.riduan1992@gmail.com sebagai apresiasi saya sebagai penulis naskah. Silahkan di sadur, diubah, diksi atau alih bahasa tanpa mengurangi inti ceritanya. Tertanda Arif Riduan. Salam Seni