Kada disuruh, kada diupah tatap pian gawi ( puisi buat pak guruku )

 

Amun manyambat tarima kasih wara, itu mungkin kada layak pian dangar
Sanja-sanja pian manabasi rumput gasan kami bakarasminan di halaman
Ada nang main bula
Ada nang babukahan
Ada nang baajakan tukup
Ada jua nang main tali gatah

Rumput-tumput panjang pian siangi
Gasan kami murid-murid pian
Kada disuruh, kada diupah tatap pian gawi

Amun baucap tarima kasih wara
Nitu kada layak tadangar pian
Pian katuju bakawan wan kananakan
Kena pian bakisah, kisah-kisah lucu
Kena pian bakisah, kisah-kisah haru
Pian katuju mahibur anak-anak murid pian
Kada disuruh, kada diupah tatap pian gawi

Asa supan mun baucap tarima kasih wara wan pian
Nang datang pian lajari sumbahyang
Nang bararamian pian lajari mangaji
Nang halus pian kasihi
Nang tuha pian hormati

Ada nang macal pian pusuti
Ada nang manangis pian paguti
Ada nang pintar pian semangati
Kada tatinggal nang tambuk pian himpui

Pian guru kada sekedar guru
Pian jua sebagai kuitan, manimang jua lawan anak murid

Amun tarima kasih wara, supan banar ulun baucap
Ulun masih ingat, bila ulun manggambar pasti pian puji
Pian sanjung, pian dukung

Ulun masih ingat pas ulun ulang tahun nang kasambilan
Pian datang mambaca du'a salamat
Isuknya pian bari hadiah buku gasan sakulah

Du'a gasan pian kada bapagatan
Du'a gasan kaluarga pian kada baampihan

Panas hujan pian badiri tagak malajari paramuka
Kada disuruh, kada diupah pian gawi

Tahalang, tasumbalit, takurihing, badabukan anak murid
Pian kada parnah basarik-sarik
Kada parnah malajari bakasar-kasar

Sadar kada sadar
Banyak sudah warisan pian nang ulun pakai

Amun ucapan tarima kasih kada cukup gasan mambalas jasa pian
Bararti Puisi gin kada cukup jua.

==========

Gasan guru ulun M. Zaini, Bapak Izai
Mudahan sidin sihat selalu.. Amiin